ឯកឧត្តមបណ្ឌិត ខាន់ វណ្ណ: រដ្ឋលេខាធិការក្រសួងយុត្តិធម៌ បានអញ្ជើញជាអធិបតីដឹកនាំកិច្ចប្រជុំបូកសរុបការងារថវិកាឆ្នាំ២០២៣ និងលើកទិសដៅការងារឆ្នាំ២០២៤ របស់អង្គភាពថវិកាថ្នាក់កណ្តាលចំណុះទីស្តីការក្រសួងយុត្តិធម៌
ទីស្តីការក្រសួងយុត្តិធម៌៖ នារសៀលថ្ងៃអង្គារ ១៥កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែធ្នូ ឆ្នាំ២០២៣ ឯកឧត្តមបណ្ឌិត ខាន់ វណ្ណ: រដ្ឋលេខាធិការក្រសួងយុត្តិធម៌ បានអញ្ជើញជាអធិបតីដឹកនាំកិច្ចប្រជុំបូកសរុបការងារថវិកាឆ្នាំ២០២៣ និងលើកទិសដៅការងារឆ្នាំ២០២៤ របស់អង្គភាពថវិកាថ្នាក់កណ្តាលចំណុះទីស្តីការក្រសួងយុត្តិធម៌ ដែលមានការចូលរួមពីឯកឧត្តម លោកជំទាវ លោក លោកស្រី ជារដ្ឋលេខាធិការ អនុរដ្ឋលេខាធិការ ប្រធានអង្គភាពទទួលបន្ទុកហិរញ្ញវត្ថុ ប្រធានអង្គ
ភាពថវិកា ប្រធានអង្គភាពចំណុះ និងមន្ត្រីជំនាញកិច្ចការហិរញ្ញវត្ថុរបស់អង្គភាពថវិកាថ្នាក់កណ្តាលចំណុះទីស្តីការក្រសួងយុត្តិធម៌។
កិច្ចប្រជុំនេះរៀបចំឡើងក្នុងគោលបំណង បង្កើនប្រសិទ្ធភាព ស័ក្តិសិទ្ធិភាព និងគណនេយ្យភាព នៃការងារថវិកា ស្របតាមបរិបទនៃការកែទម្រង់ការគ្រប់គ្រងហិរញ្ញវត្ថុសាធារណៈក្នុងវិស័យយុត្តិធម៌ ដោយផ្តោតសំខាន់លើរបៀបវារៈចំនួន ៤ គឺ៖
១.បូកសរុបលទ្ធផលការងារថវិកាឆ្នាំ២០២៣
២.ពិនិត្យ និងដោះស្រាយបញ្ហាប្រឈមក្នុងការអនុវត្តថវិកា
៣.ពិនិត្យ និងវាយតម្លៃ លក្ខណៈសម្បត្តិរបស់អង្គភាពថវិកា និងអង្គភាពចំណុះទីស្តីការក្រសួងយុត្តិធម៌ ដើម្បីរៀបចំធ្វើប្រតិភូកម្មសិទ្ធិអំណាច និងការទទួលខុសត្រូវ ជាជំហានៗ
៤.លើកទិសដៅការងារថវិកាឆ្នាំ២០២៤
